Froge an e Wyhl-Veteran

Dr Meinrad Schwörer het e großi Roll in dr Bewegung gege s AKW Wyhl gspiilt. Dr het e ganz ängs Verhältnis zu dr Natür gha. Sälli het sich aü gwaltig gregt bi siinere Licht am 15. Jänner 2015: S het Wulke gha, wiä wänn d Wält wott untergoh, un doch het uf eimol bi dr Dotemäss d Sunne ins Kirchefänschte niigschiine. Wu dr Sarg üs dr Iisägnungshalle rüs in Bewegung gsetzt wore isch, hets dunderet. Un am Grab hän sich Räge un Wind abglest.

Natür un Kültür

Wu dr Meinrad Schwörer si großi, bewegti Zit gha het, in dr 70er Johr, bi ich z Weschtberlin gsii; ich bi vu derte numme eimol zun ere Anti-AKW-Demonschtration gfahre: Uf Brookdorf. Ich han dr Meinrad erscht anne 86 persenlig  känne glehrt – im Zämmehang mit siinem un miinem Iisatz fir d alemannisch Sproch. Fir dr Meinrad isch nämlig des, was mer erhalte sott, nit uf des bschränkt gsii, was griän isch un dusse wagst, nai, fir ihne het aü des drzue ghert, was in dr regionale Kültür gwagse oder gschaffe wore isch. Do het unser Sproch drzue ghert, s Volksliädersinge un d Müssik uf dr Zither un uf andere Inschtrümänte, wu hiä e Dradition hän. D Natür in dr Region un d eige Kültür sin fir ihne e Ganzheit gsii. "S Eige zeige" isch fir dr Meinrad grad aü gegeniber Främde wichtig gsii. Afangs 90er Johr sin in dr Nochberschaft vu s Schwörers kurdischi Asylbewerber iizoge. Dr Meinrad het sich stark fir diä Lit intressiärt, ich han als emol dolmetscht. Dr het sich fir d Iiordnung vu däre Familiä in d hiäsig Gsellschaft iigsetzt, het drfir gsorgt, ass dr Bue vu däne Lit z Wyhl in dr Bogeschitzeverein goht un het-e in s hiäßig Läbe iigfiährt, wiä wänns e eigene Änkel gsii wär. Des sin Alevite gsii, wu aü vu sich üs dodrzue diä notwändig Uffeheit zeigt hän.

E ächti Volksbewegung

Dur si Granket isch er in sinene letschte Johr an s Hüüs bunde gsii. Wänn dr-e bsuecht hesch, heschDemo in Weisweil gegen AKW Wyhl kenne feschtstelle, wiä stark är in dr Erinnerunge an d Bewegung gege s AKW läbt. Des isch noch e glassischi Bewegung gsii: uf dr einte Sitte s Volk, wu „Nai hämmer gsait“ gruefe het. Uf dr andere Sitte d Staatsmacht un ihrini Politiker un Mediä, wu mit allene Mittel, vu Bolizeigwalt bis zu Luge un Verleimdunge, versucht hän, diä Bewegung kapütt z mache. Do het dr Meinrad sich an jedi Einzelheit erinneret, het bim Verzelle alli, wu im Vorder- oder Hintergrund d Bewegung uffe oder heimlig unterstitzt hän, hochläbe lo. Eso e Unterstitzung het kenne viil koschte, sogar dr eige Beruef - was dr Meinrad aü sälber gspiirt het.

Volksbewegung hit

In dr letschte zwei Johr han i d Zit un d Graft nit gfunde go zum Meinrad fahre. Am Dag, wu d Redaktion vu Charlie Hebdo vu Islamischte massakriärt wore isch, han i zu dr Fraü gsait, mer miän wider emol zuen em. Ich han-e welle froge, wiän er d PEGIDA iischetzt. Ob är do Parallele siiht: Diä Bewegung bricht Tabu, schwätzt iber Sache, wu mer nit derf rede driber, riäft „Wir sind das Volk“, wird vum Staat behinderet, wird vu dr Politiker und Mediä fascht eistimmig mit em Deifel glichgsetzt. Mer behaüptet, diä seige vu Rächtsextreme gfiährt – grad so, wiä mer dertemol d Bewegung z Wyhl het welle umeglig mache mit dr Behaüptung, si seig kommunischtisch unterwanderet. Ich han-e welle froge, wiän er des findet, ass hit dr Staat esälber demonschtriärt, ass Oberburgemeischter Demonschtratione gege d Pegida afiähre. Drej Dag speter han i erfahre, ass es zu däre Diskussion nimmi ka kumme. Dr Meinrad Schwörer isch am 10. Jänner gstorbe.

15. 1. 2015
Harald Noth

Lueg aü:

Nai hämmer gsait. Eine Bilderserie von Meinrad Schwörer