Karfrittig, 18. März 2025
Alemannischi Passion

    Z Jerusalem schwätze alli Alemannisch – so hets wennigschtens am Karfittig e Dirigänti bhaüptet. Ich bi dert z Bahlinge in dr Kirch gsii un han „Die Alemannische Passion“ aghorcht, wu do vu dr „Chorgemeinschaft Eintracht Amoltern“ und vum Kirchechor Bahlinge zämme ufgfiährt wore isch. Ja, wänn z Jerusalem alli däte Alemannisch schwätze anstatt Hebräisch un Arabisch, wär villicht meh Friide. Aber nur villicht.
    Allewäg isch do z Bahlinge (un vorher scho z Amoltere) d Passion, s Liide vum Jesus Chrischtus ufgfiährt wore. D Dirigänti het esach uf hochditsch verzellt un diä zwee Cher hän drno zämme alliwiil gsunge, was dr Jesus oder dr Judas oder dr Petrus usw. gsait hän. Des het mer gfalle – nit nur, wels uf Alemannisch gsii isch, aü wel uns do dr Spiägel vorghalte wird. Diä Mänsche um dr Jesus rum hän sich bigoscht grad eso verhalte wiä s diä hittige Mänsche diän. Dr Judas, dr Petrus, s Veronika, dr Simon vu Syrene, dr Pilatus …
    Dr Petrus isch eine vu dr dreijschte Ahänger vum Jesus gsii. Dr Heiland het em vorüs gsait: „Noch ender ass dass dr Guuler drei mol briält, wirsch dü mich verleigne!“ Un si ischs kumme: Wu dr Jesus gfange gnumme wore isch, het dr Petrus vor em Gfängnis gwartet. Remischi Soldate hän e mittle in dr Nacht drei mol gfrogt: „Bisch dü nit aü eine vu sällene, wu im Jesus nolaüfe?“
    Dr groß Chor singt an däre Stell:

Wenn mich eins froogt: „Ghersch dü zu däm?“
mach ich mir sofort ins Hämm.
Wenn alli einer Meinung sin,
bin ich debi, sunscht wird’s nur schlimm.

    Hmm. Des kunnt mer doch bekannt vor. So hets dr Peter Modler vu Amoltere dichtet. Hoffentlig wird diä Passion in dr nägschte Johr aü in andere Kirche ufgfiärt.

Worterklärungen: schwätze - reden; dert - damals; däte ... schwätze - reden würden; allewäg - auf jeden Fall; bigoscht - bei Gott; diän - tuen; ender as dass dr Guuler drei Mol briält - ehe der Hahn drei Mal kräht; vu sällene - von jenen; debi - dabei