www.noth.net/lueginsland/blog.htm

    Dass ich e Freijnd un Verfächter vum Alemannische wore bi, des het mit ebis agfange, wu mer z Berlin bassiärt isch. Ich ha nämlig 14 Johr in sällere deilte Stadt gwohnt un gschafft. Üs dr Heimet han i Sache ghert, wu mer arg gfalle hän: Dr Widerstand gege s AKW zerscht z Briisach un drno z Wyhl. Do het s Volk emol sälber dänkt un het Muet zeigt, do hän 30.000 Kaiserstiähler, Elsässer, Friburger usw. gege dä blant "Affekaschte" demonschtriärt un hän-e verhindetet. Des isch d Geburtsstund vu dr Griäne gsii - un e große Irrtum. S fählt nimmi viil, no fiähre d Griäne d Atomkraft wider ii.
    In sällere Zit, s isch anne 81 gsii, het mer mi Schwoger emol e Kassett vum Roger Siffer gschickt. Des isch e Elsässer un ich han e mittle in Weschtberlin am Aüdo-Radio ghert wiä n er singt: "D Räwe butze, d Räwe hacke, d Räwe spritze, schniide. D Geise bsorje, d Geise mälke, d Geise dränke, fiädere." usw. Mich hets vu dr Socke ghaüe, ass mer in dr Sproch vu minem Volk ka iber ernschti Sache singe, des isch mer vollständig neij gsii. In mir isch Heimweh  üsbroche. S het no 5 Johr düürt, bis i d Koffer packt han un üs däm Berlin mit sinere dekadente, extravagante un extreme Kültür verdloffe bi.
    D alemannisch Sproch het sich dertemol im Elsass ufbaimt, mer het dichtet un gsunge ums Iberläbe - s Iberläbe vum Ditsche im Elsiss. Des isch gsii wiä bim e Baüm, wu merkt, ass er mueß verecke un wu Angschttriib üsbildet. Hit isch dä Bluescht fascht ganz verbiähjt, d Pariser hän erreicht, was sie hän welle. Diä Liäder, wu zum Beschte ghere, was s Elsiss z biäte het, findsch numme no sälte - ganz wennig uf Youtube un wänn dr di mit mir guet stellsch, findsch e Hüffe no bi mir. Diä Nämme vu däne Liädermacher heiße Francois Brumbt, René Egles, Roland Engel - Roland Engel - Roland Engel, Robert-Frank Jacobi, Roger Siffer un anderi; unter dr Dichter isch dr André Weckmann dr Bekanntescht gsii.

Des isch "speak white" vum Weckmann, vertont un gsunge vum Egles - eins vu dr Beschte:

red wiss
neger
wiss esch scheen
wiss isch nowel
wiss esch gschit
wiss isch franzeesch
franzeesch isch wiss
wiss un chic
elsasser
elsassisch degaje
net
zall esch brimidiv
vülger
pfui!
drum red wiss neger
illneger brischneger moderneger
drum redd wiss
wiss wi z bariss
un dunk dini negersproch
en formol
un schank se em müseum
drum red wiss
neger
dass d wiss wursch
andli
wiss un gschit
wiss un chic
wiss wi z bariss

Worterklärungen: Elsiss - Elsass; ebis - etwas; in sällere - in jener; Räwe - Reben; fiädere - füttern; verdloffe - weggerannt; dertemol - damals; Bluescht - Blüte; e Hüffe - eine Menge; degaje - dagegen; zall - jenes; Illneger usw. - Illneger usw. (benannt nach Flüssen im Elsass); dass d wiss wursch andli - damit du weiß wirst endlich