www.noth.net/lueginsland/blog.htm

    D Lehrer gehn uf em Zahnfleisch. Üs allene Ecke kunnt Gjomer. S isch in normale Zitte scho schwär, e Glass mit iber 20 Schuelerbuebe un Schuelermaidli z bändige, wu drheim viilmol ke Astand un ke Ordnig glehrt hän. Wirgli mueß dr Lehrer (meischtens sin des Lehrerne) no ufbasse, ass sini Zegling d Larve ufhän - alli Morge kumme de Deil ohni Larve a un d Lehreri mueß ins Sekretariat ränne go e baar uftriibe. Alli Morge miän d Kinder drno viär Mol d Händ wäsche - dänk emol, 20 Kinder an einem Waschbecke, mai do gohts zue! Alli Ritt mueß s Fänschter ufgmacht wäre un alli Mol fange fascht alli a dr Kittel viiri liäche un alege. Fänschter zue - alli ziäge s Tschebli üs. Un zwische drin sott däne Kinder no ebis biibrocht wäre. In dr Paus goht s Gschäft fir dr Lehrer erscht richtig los; dr mueß ufbasse, ass si Glass sich nit mit andere Glasse mischt. Dr Schuelleiter blogt hinterhär d Lehrerschaft no alli Ritt mit unnetige Kumferänze un wänn d Lehreri drno ändlig drheim isch, schällt s Delifon un wiätigi Eltere froge, wiä s jetze witterscht goht un wiä ihre Dochter unter däne Umständ e Einser mache soll - un nai, diä Frog isch nit rhetorisch, diä Miätere meine wirklig, d Lehreri kennt in däre Situation zaubere.
    In däre sälber gmachte Pandemii wird viil kapütt gschlage, vum Aütozueliiferer bis zum Ogsewirt. Bsunders eländig: In unsere Kinder wird e Schueljohr gstohle. Un wänn drno dr Lade wider emol laüft, losst mer si alli Frittig firs Glima gumpe.

Worterklärungen: jomere - jammern; Schuelerbuebe - Schulbuben; Schuelermaidli -Schülerinnen; viilmol - oft; glehrt - gelernt; ke - kein; wirgli - zur Zeit; Lehrerne - Lehrerinnen; Larve - Maske; alli Morge - jeden Morgen; e Deil - manche, ein Teil; mai - stell dir vor; alli Ritt - immer wieder; alli Mol - jedes Mal; dr Kittel viiri liäche - die Jacke hervorkramen, herausziehen; s Tschebli - das Mäntelchen; sott - sollte; ebis - etwas; wiätigi - wütende; witterscht - weiter; Miätere - Mütter; gumbe - Sprünge machen